الإساءة العاطفية..جرح صامت وناقوس خطر .
كتبت د/ سارة أبو طالب
الإساءة العاطفية مش لازم تكون ملموسة ، او بتظهر في سب أو إهانة واضحة،
ساعات بيكون تلمذ صغير يوجع، أو موقف مؤذي بيتكرر، أو تعامل يخليك تشك في نفسك، أو تفقد ثقتك بنفسك تدريجيًا ..وهكذا
وعلشان كده علم النفس بيعتبرها واحدة من أخطر أنواع الإساءة الغير ملموسة ؛ لأنها بتهدم الإنسان من الداخل من غير أثر ظاهر أو واضح للآخرين ..
_ يعني إيه إساءة عاطفية⁉️
هي أي نمط سلوكي يتبعه الآخرين وهدفه السيطرة، التقليل والاستهتار، أو تهديد استقرارك النفسي
و بتظهر على شكل كلمات، تصرفات، صمت عقابي ، تجميد مشاعر
أي شيء يخليك تحس إنك أقل، أو غلط، أو مش مستقر..
وعلميًا، الإساءة العاطفية بتأثر على:
▫️الجهاز العصبي (زيادة هرمون الكورتيزول)
▫️طريقة التفكير (تشوهات معرفية)
▫️العلاقات المستقبلية (فقدان الثقة وتجنب الارتباط)
▫️احترام الذات وتقدير النفس.
_ أنواع الإساءة العاطفية ❗️
علم النفس بيقسمها لأنماط واضحة جدًا كل نوع له شكل وتأثير خاص :
⬅️ التقليل من القيمة (Devaluation)
بمعنى إن الطرف الآخر يقلل منك ومن شكلك، شغلك، شخصيتك، أحلامك ،طريقة كلامك ،عيشتك ..وهكذا
زي كده الجمل اللي شكلها هزار من بره ، بس هدفها يكسرك من جوا.
_ علاماته بتكون ازاي ⁉️
▫️”إنتِ مكبرة الموضوع”..
▫️”أصل انتِ مش قد كده في الشغل”..
▫️مقارنات مستمرة بغيرك..
_ تأثيره النفسي:
يعمل Self-Doubt يشككك في قدراتك ويخليك تصدق إنك قليل او انك عديم القيمة ..
⬅️ التلاعب النفسي (Manipulation) :
وهنا المسيء يستخدم مشاعرك ضدك علشان ياخد اللي هو عايزه او يحقق هدف في دماغه ..
وأشكاله:
▫️الشعور بالذنب :
“علشان مشيتي؟ طب خلاص أنا همشي من حياتك”..
▫️المبالغة في لعب دور الضحية..
▫️الضغط غير المباشر..
وتأثيره:
تشويش في الحكم، وفقدان القدرة على اتخاذ قرار طبيعي..
⬅️ الألغاز النفسية :
وده أخطر نوع، لأنه بيخليك تشك في عقلك نفسه..
زي مثلاً:
▫️بينكر أحداث حصلت فعلًا ..
▫️بيقلل من مشاعرك ويقول إنها تهييؤات او انك موهوم ..
▫️يحاول يقنعك إن رد فعلك مبالغ دايمًا وانك بتضخم الامور ..
وتأثيره:
بيؤدي إلى اضطراب في الثقة بالنفس، قلق مُزمن، واعتماد زائد على رأي الطرف الآخر..
▫️الصمت العقابي (Silent Treatment) :
وده مش مجرد زعل ..
ده استخدام الصمت كعقاب وسيطرة وضغط نفسي عليك .
ومن علاماته انه :
▫️يختفي فجأة بعد خلاف..
▫️رفض الكلام معاك إلا لما تستسلم..
▫️يعاملك ببرود متعمد لدرجة تخليك تسأل نفسك هو في ايه ! ..
وتأثيره: إنه بيولد عندك خوف من الهجر ويعمل Overthinking وتعظيم وتضخيم للذنب ..
⬅️ السيطرة والتحكم (Controlling Behaviour) :
وهو إن كل حاجة لازم تكون من خلاله هو بتحكماته وتنظيره ..
زي مثلاً :
▫️التحكم في لبسك، أصحابك، وقتك..
▫️التدخل في قراراتك بحجة الخوف عليكي..
▫️منعك من حدودك المسموح بها كإنسان له حدود وحقوق ..
وتأثيره: انه يفقدك استقلالك وهويتك ،واستحقاقك ..
⬅️ التهديد العاطفي (Emotional Threatening) :
مش تهديد عنيف بس هيخوفك من فقده أو من انهيار العلاقة عمومًا ..
زي مثلاً :
“لو ماعملتيش كده هسيبك” ..
“أنا الوحيد اللي بيتحملك “..
“محدش هيحبك غيري”..
وتأثيره انه :
بيبني علاقة قائمة على الخوف بدل الأمان او وجود مساحة آمان بين الطرفين..
⬅️ السخرية والإهانة المقنعة :
تهريج شكله لطيف من بره لكن جواه لسعة مؤذية كده غير ملموسة ..
زي مثلاً :
▫️نبرة تهكم..
▫️ضحك على مشاعر حقيقية ومهمة..
▫️كلام يقلل من شكلك أو طباعك قدام الناس..
وتأثيره انه :
بيكسر احترامك لنفسك، ويدخلك في صراع داخلي مستمر..
_ طيب ليه الناس بتستمر في علاقة فيها إساءة عاطفية ⁉️
علميًا فيه 4 أسباب رئيسية:
1▫️ التعلق القلِق: الشخص يتمسك أكتر لما يتألم..
2▫️ دورة الإساءة : فترة إساءة ⬅️صلح مؤقت ⬅️أمل كاذب.. وهكذا
3▫️التطبيع النفسي: لما التعنيف يتكرر، المخ يعتبره عادي ومسموح به ..
4▫️ الخوف من الوحدة والهجر أو فقد العلاقة..
_ ومن العلامات اللي بتدل إن العلاقة بقت مؤذية نفسيًا بالفعل هو إنك:
▫️بتحسي إنك طول الوقت غلط..
▫️ بتخافي تعبري عن مشاعرك ..
▫️انعدام الأمان العاطفي..
▫️لوم مستمر وجلد ذات ..
▫️تذبذب بين الشد والجذب..
▫️إجهاد نفسي وانهيار الثقة بالنفس..
السؤال المضمون والمهم
هو إزاي أحمي نفسي وأتعافى من التأثيرات دي ❗️
▫️ اولاً .تسمية الإساءة:
مجرد إنك تعترف إن اللي بيحصل إساء ده أول خطوة في العلاج من الأساس ..
▫️ثانيًا. وضع حدود واضحة:
(لا) الصحية، ووقف التلاعب، وتقليل مساحة التأثير..
▫️ثالثًا. دعم اجتماعي :
صديق مقرب ايجابي / او أخصائي يساعدك تشوفي الصورة بوضوح..
▫️رابعاً . علاج نفسي لو لزم الأمر وخصوصًا لو في قلق غير عادي ، نوبات بكاء مستمرة ، كره ذات او التفكير في أذى النفس ..
▫️خامسًا .إعادة بناء الصورة الذاتية:
دايمًا ذكر نفسك بقيمتك، مهاراتك، انجازاتك حتى لو صغيرة او بسيطة ،نقاط قوتك ،نجاحاتك …
وللتذكرة :”من لم يكن نورًا لنفسه، لن تضيئه كل أنوار الكون “.
