ازاي ممكن نفك التعلق بخطوات بسيطة ومختصرة.. للبنات بسن المراهقة ‼️
كتبت د/سارة أبوطالب
اولا : الاعتراف بالمشاعر
أول خطوة إنك تعترفي إن عندك تعلق، ومفيش داعي تلومي وتجلدي نفسك
المشاعر دي طبيعية في سنك، لكن محتاجة تتعلمي تتحكمي فيها بوعي .
ثانيًا : تغيير زاوية التفكير
التعلق غالبًا بيجي من فكرة “أنا محتاجة الشخص ده عشان أبقى سعيدة”، ولازم تتحول لفكرة: “أنا بقدر أكون سعيدة من غير ما أعتمد على حد”.
ثالثًا : توسيع دائرة الاهتمام
تحاولي تدخلي أنشطة جديدة (رياضة، هواية، قراءة ، كورسات)..لما يكون عندك وقت ممتلئ بحاجات مفيدة، عقلك ومشاعرك هتقل فيها مساحة التفكير في الشخص.
رابعًا : تدوين المشاعر
اكتبي يوميًا مشاعرك في دفتر : “أنا حاسة بكذا، اللي ناقصني كذا…” وهعالج الأمر بكذا وهنا نعمل اعادة توجيه بشكل ايجابي متزن ،
الكتابة عمومًا بتخلي المشاعر تتفرغ وتقل.
خامسًا : تحديد الحدود
لو الشخص موجود في حياتك بشكل يومي (سوشيال ميديا ، أو مقابلات، او صلة قرابة أو جيران )، حلولي تقللي الاحتكاك تدريجيًا، واي مراقبة او تتبع اخبار ،حاولي تخففي الوجود لحد ما تتوازني.
سادسًا : تعزيز الثقة بالنفس
اتعلمي تقولي لنفسك : “أنا كافية، قيمتي مش مرتبطة بوجود شخص في حياتي” ،وان مش ده السن اىمناسب للارتباط الناضج ولا صُنع حياة مسؤلية ، وممكن تكتبي جمل إيجابية وتكرريها علشان مشاعرك تتزن .
سابعًا : الدعم العاطفي
تحكي لمقربين تثقي فيهم (أمك، اختك الأكبر منك ، الأخصائي بتاعك ) عشان متبقاش الوحدة هي اللي بتدفعك ترجعي للتعلق.
ثامنًا :التركيز على المستقبل
تحطي لنفسك أهداف قصيرة وطويلة، تفتكري إن اللي بتمري بيه مرحلة مؤقتة وهتعدي، وإنك عندك مستقبل محتاج حضورك الكامل.
وأهم حاجة انك تعرفي ان : التعلق مش حب، التعلق معناه إنك معتمدة على الشخص علشان تحسي بالأمان او انك مرغوب فيكي ،
ولكن الحب الحقيقي بييجي بعد النضج، في السن المناسب والوقت المناسب ولما الإنسان يبقى مستقر في نفسه أولاً.
