الفرق بين التفكير الزائد .. والتأمل في خطواتك القديمة
كتبت د/سارة أبو طالب
في كتير من الناس بتتلخبط بين التفكير الزائد والتأمل في الماضي ، وبيفتكروا إن أي رجوع للذكريات أو مراجعة للقرارات هو ضعف أو جلد للذات.
لكن الحقيقة النفسية بالفعل بتقول إن الفرق بينهم كبير واحد بيستنزفك، والتاني بيزيد وعيك ونضجك .
_ يعني ايه التفكير الزائد ⁉️
_التفكير الزائد (Overthinking) هو:
▫️دوران الفكرة في دماغك بشكل متكرر بدون نهاية ..
▫️تحليل نفس الموقف مئات المرات
▫️البحث عن إجابات مش موجودة
▫️محاولة تغيير شيء انتهى بالفعل
ونفسيًا، التفكير الزائد مرتبط ب :
▫️القلق
▫️ضعف الإحساس بالأمان
▫️الخوف من فقدان السيطرة
▫️صدمات أو تجارب سابقة لم تُعالج نفسيًا
⬅️ وبنقدر نستشعره ازاي !
بعده هتحس بتعب، توتر،إرهاق ، صداع، أو حالة إحباط ..
ومفيش قرارات ولا حلول واضحة .
_ طيب و التأمل في خطواتك القديمة ❗️❗️
⬅️اولًا التأمل الصحي و هو بيكون :
▫️وقفة هادئة مع النفس
▫️مراجعة الماضي بدون قسوة
▫️فهم: ليه تصرفت كده؟
▫️استخلاص درس ثم ترك التجربة مكانها
ونفسيًا، التأمل مرتبط ب:
▫️النضج العاطفي
▫️الوعي الذاتي
▫️التعافي والتشافي
▫️تقوية الحدس واتخاذ قرارات أهدى وأركز
و بعده بالفعل بتحس بفهم، واتصال بنفسك ، هدوء، أو وضوح حتى لو الوجع مازال موجود ..
📝 بشكل أبسط الفرق الجوهري بينهم ان :
(التفكير الزائد )⬇️⬇️
▫️بيجلدك مش بيرحمك
▫️بيعيد نفس المشاعر
▫️بيعلقك في الماضي
بلا نهاية
▫️قائم على الخوف
لكن (التأمل )⬇️⬇️
▫️بيكون فيه رحمة لذاتك
▫️بيستخرج معاني ودروس
▫️بيحررك من الماضي
▫️له بداية وله نهاية
▫️قائم على الوعي
_ وفي علم الأعصاب (Neuroscience) الأبحاث بتشير إن:
التفكير الزائد بينشط اللوزة الدماغية (Amygdala) وهي المسؤولة عن الخوف والإنذار..
والتأمل الواعي ينشط الفص الجبهي (Prefrontal Cortex) وهو المسؤول عن الوعي والتنظيم واتخاذ القرار
وده يفسر ليه:
التفكير الزائد بيتعب الجسد والروح
والتأمل بيهدي الجهاز العصبي
_ السؤال المُحير هنا ليه أحيانًا بنسمي التفكير الزائد تأمل ⁉️
⬅️ لأن العقل أحيانًا بيخاف يسيب الألم، فبيتعلق بإعادة تحليله بدل من مواجهته وتركه..
فنقنع نفسنا إننا بنراجع بينما إحنا في الحقيقة بنغرق..
_ طيب إزاي تعرف إنت في أنهي حالة فيهم ؟!
اولاً اسأل نفسك :
▫️هل أنا بدور على معنى ؟ ولا بدور على لوم ؟
▫️هل الفكرة بتقربني من نفسي؟ ولا بتبعدني؟
▫️هل بعد التفكير حاسس إني أقوى؟ ولا أضعف؟
السؤال المهم هنا إننا إزاي نحول التفكير الزائد إلى تأمل صحي؟ !
▫️ حدد وقت للتفكير، مش تفكير مفتوح بعدد ساعات كبير
يعني ممكن تخصص من ١٠ ل ٣٠ دقيقة للتأمل الصحي
▫️ اكتب واعمل تدوين بالدروس المستفادة بدل ما تعيش الإحساس بالسوء
▫️اسأل نفسك: إيه اللي أتعلمته؟ مش ليه حصل كذا ؟
▫️ لما يخلص المعنى وتفهم الدرس المستفاد اقفل الصفحة دي بوعي .
📝 للتذكرة : افتكر كويس ان جلد الذات عدو الاستقرار النفسي والرضا ،بينما التأمل الصحي شفاء واعي يدعو للاستمرارية بالحياة بإستقرار نفسي متوازن ..
وحقيقي مع الوقت هتُدرك إن التفكير الزائد ما هو إلا محاولة عقلية للسيطرة على ألم لم يُحتوى بعد وعليك احتوائه والتصالح معاه في اقرب وقت .
