احتواء الأطفال وبناء السلوكيات الطيبة… من أبسط الحاجات وأعمقها: “قصة قبل النوم” .!
كتبت د/سارة ابو طالب
في وسط زحمة اليوم، وضغط الشغل، ودوشة الاولاد ،والجري ورا المسئوليات.. ساعات بننسى إن الطفل مش محتاج حاجات كبيرة علشان يحس بالأمان والحب والاحتواء .
ممكن تختمي يومك معاهم بوقت بسيط لطيف كله دفئ وحنان
بقصة قبل النوم هتعمل فرق حقيقي وممتد لسنين قدّام، وبتبني جوانب في شخصية الطفل يمكن ما نقدرش نبنيها بالكلام المباشر.
ليه قصة قبل النوم مهمة؟!
▫️بتخلق لحظة احتواء صافية
وقت القصة هو اللحظة اللي الطفل بيحس فيها إنك موجود عشانه وبس..
حضن ، صوت هادي ، ضحكة خفيفة كل ده بيكون عنده شعور بالأمان،والارتياح
وده أساس أي تربية صحية.
▫️ بتوصل وبترسخ القيم من غير ما يحس إنه بيتلقّن :
القصة بتدخل للقلب أسرع من النصائح والأوامر المباشرة
لما يسمع حكاية عن طفل شجاع أو بنت شاطرة ، الخيال بيزرع القيمة جوّاه من غير ما يحس إن حد بيأمره.
▫️بتقوي الرابط بينكم:
كل يوم قصة يعني كل يوم ذكري جميلة في دماغ طفلك ..
حتى لما يكبر، بيرجع يتذكر الوقت ده ويحس إنك كنت دايماً قريب منه.
▫️ بتساعده ينام وهو مطمن:
المشاعر قبل النوم بتأثر على الطفل طول الليل ..
يعني قصة هادية ونبرة صوت كلها اهتمام و محبة بتخلي نومه أعمق وقلقه أقل وخوفه منعدم .
▫️ بتحفز الخيال والتفكير :
القصص بتفتحله باب عالم واسع يشوف فيه نفسه، ويكتشف مواقف، ويفهم مشاعر ويعرف يحط نفسه مكان غيره..
وده بالفعل أساس الذكاء العاطفي والاجتماعي .
_ إزاي نختار قصص تساعد في بناء السلوكيات؟!
▫️اختاري حكايات فيها قيم بسيطة: الصدق، التسامح، الشجاعة، التعاون ،الايثال ،الاجتهاد ..وهكذا
▫️ركزي على بطل يكون قريب من سنه، علشان يقدر يتخيل نفسه مكانه.
▫️اسأليه بعد القصة:
إيه أكتر حاجة عجبتك؟
لو كنت مكانه كنت هتعمل إيه؟
دي الطريقة اللي بتخليه يفهم القيمة من غير ضغط.
احتواء الطفل مش محتاج معجزات هو محتاج لحظة اهتمام صادق من قلبك توصل لقلبه ..
وحقيقي قصة قبل النوم مش مجرد كلام بيتقال وخلاص
هي بالفعل رسالة غير مباشرة بتقول للطفل:
أنا جنبك ،بسمعك ، وبفهمك ،وبكبر معاك، وبكون ليك ذكريات لطيفة ..
وكل قيمة بتتحكي في قصة، بتتحول جوه قلبه لبذرة ،وعقيدة ومبدأ تكبر لما يكبر، وتبان في تصرفاته واختياراته وسلوكياته بالمستقبل .
