الأطفال يفعلون ما يشاهدونه..!
كتبت د/ سارة أبوطالب
نفسيًا /الطفل بيتشكل نفسيًا من خلال
الملاحظة والتجربة اليومية
أكتر بكتير من الكلام أو فرض العقاب..
في دماغ الطفل حاجة اسمها
الخلايا العصبية المرآتية (Mirror Neurons)
ودي بتخليه يقلد نبرة الصوت، طريقة الغضب، أسلوب الحوار ..وهكذا
حتى لو ما حدش قاله يعمل كده
يعني ايه !!
بيت فيه صراخ = جهاز عصبي متوتر
تعامل قاسي = طفل دفاعي أو عدواني
هدوء واحتواء = طفل آمن نفسيًا وعقليًا
وده بيتقاطع مع نظرية التعلق (Attachment Theory)
اللي بتقول إن الطفل لما يحس إن اللي حواليه مصدر أمان
مش تهديد،
مخه بيتبرمج على الثقة، الهدوء، وضبط المشاعر.
علشان كده،
مش كل طفل عنيد محتاج تقويم،
ولا كل طفل عصبي محتاج عقاب،
في أطفال محتاجة أمان
قبل ما تحتاج توجيه..
ربنا قال :
﴿وَجَعَلَ بَيْنَكُم مَوَدَّةً وَرَحْمَة﴾
الرحمة مش ضعف،
الرحمة بيئة مؤثرة
ينمو فيها الإنسان سليم من جواه اولاً..
فلو عايزين نغير سلوك أولادنا ،
نراجع الأول:
▫️صوتنا
▫️ردود فعلنا
▫️طريقتنا في التعبير عن الغضب
لأن الطفل بيتعلم ازاي يكون إنسان وبيطبق معنى الإنسانية لو البيئة المؤثرة المحيطة تكمن فيها مظاهر الإنسانية والرحمة والتربية بوعي .
