فن المسافات… مهارة نفسية عليك إتقانها
كتبت د/سارة أبو طالب
في علم النفس يُقال ان العلاقة الصحية مش مبنية على الحب فقط ، ولكن على حدود صحية واضحة ..
الحدود دي هي اللي بنسميها فن المسافات: اي المساحة اللي بتحافظ على وجودك من غير احتراق نفسي او صدمات متتالية ، وعلى وجود الطرف الآخر من غير ما يتخطّى عليك.
_ ليه المسافات مهمة؟!
▫️اولا وبشكل علمي لتنظيم الجهاز العصبي :
الدراسات بتقول إن الأشخاص اللي عندهم حدود واضحة بيبقوا أقل عُرضة للتوتر والقلق ؛ لأن دماغهم مش طول الوقت في حالة يقظة أو خوف من التعدّي
والمسافة الصحية بتسمح للجهاز العصبي إنه يهدأ ويشتغل بشكل متوازن ومُريح .
▫️ثانيًا نظرية التعلق (Attachment Theory) :
الباحثين لقوا إن الشخص اللي اتربى على ارتباط آمن بيكون عنده قدرة يحافظ على قرب وراحة نفسية في العلاقات الاجتماعية من غير ما يختنق أما اللي عنده قلق أو تجنُب، فالمسافة بتكون وسيلة علاجية لإعادة ضبط العلاقة بشكل آمن .
▫️ثالثًا الصحة النفسية والهوية الشخصية:
الدراسات الحديثة بتُثبت إن غياب الحدود بيؤدي لاضطراب في الإحساس بالذات، لأن الشخص بيكون مَسحوب دايمًا في رغبات وسيطرة الآخرين.. ووجود مسافة صحية بيقوي الإحساس بالهوية وبيزود الثقة بالنفس وتقدير للذات.
_ وللتذكرة :فن المسافات مش بُعد ولا هجر … ده قرب صحي بالفعل..
والمسافة مش معناها إنك تبعد أو تكون شخص قاسي ؛ بالعكس هي احترام، ووعي، واعتراف إن كل إنسان له مساحة خاصة محتاج يحميها..
وزي ما ربنا خلق الشمس والأرض بينهم مسافة لعدم إحتراق الأرض
وزي ما الطبيعي وانت ماشي بعربيتك بتترك مسافة بينك وبين العربيات اللي قدامك منعًا للإصطدام والحوادث ..
فهنا المسافة بتقولك: أنا معاك بس مش على حساب نفسي..
_ ممكن نفهم ده بأمثلة اكتر لمسافات صحية ومن منظور علاجي ؟!
اكيد وهي :
▫️إنك تقول (لا) لما تكون في امور مرفوضة بالفعل وهتيجي عليك ومن غير إحساس بالذنب.
▫️إنك ترد على رسائل لما تكون جاهز لده ، مش تحت ضغط او سيطرة .
▫️إنك تحافظ على وقتك الخاص حتى لو بتحب وعاوز ترضي الأشخاص اللي حواليك .
▫️إنك ما تتحملش مسؤولية مشاعر الآخرين بالكامل هما بالفعل مسؤولين عنها زيك.
_ فين المشكلة⁉️
المشكلة بتحصل لما المسافات تبقى إما:
▫️ضيقة زيادة عن اللزوم (اختناق، تبعية، غيرة، قلق )
▫️واسعة بزيادة
(برود، انعزال، انفصال نفسي)
والاتنين بيكسروا العلاقة.
_ إزاي نطبق فن المسافات في حياتنا اليومية بشكل آمن ؟!
▫️ استمع لجسمك: لو جسمك متوتر ومتألم ودماغك مضغوطة ،وعندك صدمات مختزنة
يبقا في حد متجاوز حدودك .
▫️حدد احتياجاتك الذاتية: (الراحة ، الوقت ، الهدوء ، الخصوصية)..
▫️ اتكلم بوضوح:
(أنا محتاج وقت لنفسي)
مش اختفاء ولا صمت عقابي..
▫️ اتقبل إن الآخرين عندهم مساحتهم واحترمها : وزي ما انت محتاج تبعد شوية، هما كمان ..
▫️ماتخافش من فقدان العلاقة: العلاقة اللي بتنهار بسبب حدود هي كانت ضعيفة من البداية ..
_ للتذكرة مرة تانية : اتقان فن المسافات ضرورة مش رفاهية وده شرط أساسي لصحة نفسية سليمة وعلاقات اجتماعية مستقرة وصحية ومتزنة ..
فلا تقترب إلى حد “إبصار العيوب ” ، ولا تبتعد إلى حد “نسيان المحاسن”..
اتدرب انك تحترم حدودك وحدود غيرك، وبكده هتصون نفسك من الاستنزاف ، وبتدي كل علاقة فرصة إنها تكبر على أرض ثابتة مش هشة ..
“فلا ثقيلاً يستغنى عنك ولا خفيفاً يُستهان بك، لا قريباً يملّ ولا بعيداً يُنسى”.
