هو في فرق بين كتمان وكبت المشاعر
كتبت: د/ سارة أبو طالب
هو في فرق بين كتمان وكبت المشاعر🩹 !!
الإجابة :نعم ✅️
: الكتمان Suppression
هو إنك تكون واعي إنك متضايق أو غضبان بس تختار تهدى وتتكلم بعدين..
مثلاً:
حد زعلك في شغلك، وانت قررت تسكت دلوقتي علشان الموقف مش مناسب، ولما بترجع البيت تكتب اللي ضايقك أو تتكلم مع حد ترتاح له..
ساعتها انت كتمت مشاعرك بس بشكل صحي لأنك فرغت اللي جواك بعدين.
الكتمان مفيد لما:
▫️يكون بسبب حد سلبي عنده محدودية تفكير
ولا يفقه في ثقافة العتاب
▫️تكون سايق أو في اجتماع او وسط تجمع اسري ومينفعش تنفعل
▫️حد مش مناسب تفتح معاه قلبك
▫️محتاج وقت ترتب أفكارك وكلامك .
: الكبت Repression
الكبت أخطر لأنه لا واعي..
يعني إحنا مبناخدش بالنا إننا بنكتم، وبتتراكم المشاعر جوانا من غير تفريغ .
مثلاً:
طفل كل ما يعيط يقولوله”اسكت عيب”، “الولد ميعيطش”، “هتضرب “…وهكذا
هيكبر الولد وهو مش بيعبر، ومع الوقت تلاقيه بيتعصب بدون سبب، أو بيعيط فجأة، أو جسمه يتعب من غير مرض واضح، او يبقى عنده إفراط تفكير …
وده لأن المشاعر اتحبست واتكبتت جواه سنين.
ازاي اقدر أحول الكبت لتعبير صحي ؟
أولاً/ اعترف بمشاعرك:
قول لنفسك:
أنا زعلان
أنا مضغوط
أنا محتاج أتكلم
مجرد الاعتراف بالمشاعر بيريح.✅️
ثانياً/ اكتب اللي جواك:
الورق دايمًا بيسمع ومبيحكمش،
الكتابة والتدوين بتقلل من التوتر جدًا..
ثالثًا/ اتكلم مع حد آمن:
اختار شخص يسمعك بصدق مش ينتقدك
مش لازم كل الناس تعرف اللي جواك، بس شخص واحد إيجابي مأمون الجانب يكفي.
رابعًا/ اسمح لنفسك تعيط:
البكاء مش ضعف خالص زي ما البعض معتقد أو على ما اتربى، والتعبير عن انك غاضب بردو مش غلط..
الغلط إننا ندفن كل ده لحد ما ننهار ونمرض.
وأخيراً / لو الموضوع تقيل عليك .. اطلب مساعدة
جلسة علاج أو استشارة نفسية مش عيب، بالعكس دي أولوية أولوياتك إنك تحافظ على صحتك النفسية .
