التعنيف جرح بيفضل مفتوح لسنين..!
كتبت : د/سارة أبوطالب
الطفل اللي بيتشتم، ويتوبخ، ويتضرب أو يتقل منه،
أو يتقاله (إنت غلط_إنت فاشل_ إنت سبب المشكلة
مش بيكبر وينسى .!
هو بيكبر وهو شايل الكلام و المشاعر السلبية دي جواه ..
الأطفال اللي بيتعرضوا ل تعنيف مستمر من آبائهم، ده بالفعل بيأثر على نفسيتهم وهما كبار بطريقة أعقد و أعمق بكتير مما نتخيل :
▫️ يفقدوا ثقتهم بنفسهم
لأن الصوت اللي جواهم دايمًا بيشبه صوت اللي كان بيصرخ فيهم ومكانوش وقتها قادرين يعبروا .
▫️ بيبقوا حساسين جدًا للنقد
مش لأنهم ضعاف، لكن لأن النقد بالنسبة ليهم مش رأي… ده تهديد.
▫️ يعانوا من الخوف من الغلط
لأن الغلط زمان كان معناه صراخ، عقاب، أو إهانة… مش مجرد تجربة نتعلم منها.
▫️ بيواجهوا صعوبة في العلاقات
اللي اتوجع زمان من أقرب حد له، بيبقى صعب عليه يثق أو يحس ب الأمان بسهولة لو قابل حد كويس بالفعل .
▫️ بيميلوا للصمت أو الانسحاب
لأنهم اتعلموا إن صوتهم مالوش قيمة، وإن الكلام بيعمل #مشكلة مش بيحلها.
▫️ بعضهم بيكرر نفس الدائرة بالفعل
وبيتعامل بعنف من غير ما يقصد وده لأنه اتربى على إن دي الطريقة الطبيعية للتربية .
_وفي الجانب الآخر فيه منهم اللي بيقرر إنه يكسر الدائرة ويتعافى.
ويكون نسخةجديدة من نفسه ألطف وأحن واهدى.. لأنه عرف طعم الوجع، ومش عايز حد يذوقه.
خلاصة التوجيه:
إن الطفل اللي بتعنفه النهاردة ..هو الشخص اللي هيتوجع سنين قدام ،وهيكون غير متعافي بسببك.
ولما بنقول تربية بدون عنف ده مش دهاء ولا دلع…
ده حماية لنفسية هتعيش العمر كله وهتتوارث لأجيال
_ وإليكم بعض الإرشادات التربوية الإيجابية والمهمة جدًا :
▫️ شجّع وعزز السلوك الجيد (الايجابي )
الطفل اللي بيتشاف لما يغلط بس، بيزيد غلطه وعناده
إنما اللي بيتشاف لما يعمل حاجة إيجابية ونشجع محاولاته
بيكررها سلوكًيا وتصبح عادة ..
▫️ احفظ كرامة طفلك حتى في لحظات الغضب
مافيش حاجة تبرر الإهانة أو المقارنة أو التقليل من وجوده.
الطفل هينسى الألم الجسد
لكن مش هينسى كلمة وجعته وكسرته لسنين..
▫️ افصل بين السلوك والطفل كشخص..
وبدل ما تقول:
إنت غلطان… إنت بتعمل مشاكل
قول:
التصرف ده غلط، وهنصلحه مع بعض..
هنا الطفل لازم يفهم إن خطئه لا يعني إنه سيئ أو منبوذ ..
▫️ انزل لمستوى الطفل واسمعه
قبل ما تعاقب، اسأل:
إيه اللي حصل؟
كنت حاسس بإيه؟
الاستماع بيقلل من عناد الطفل بنسبة 50% بالفعل ، لأنه ببساطة هيحس إنه مفهوم او
له مساحة آمنة يتفهم ويفهم ..
▫️خليك قدوة
لو عايزه يهدى ..اهدى
لو عايزه يسمع ..اسمعه
لو عاوزه يصلي ..صلي قدامه
لو عاوزه صادق ..أصدق القول معاه
الأطفال بيتعلموا من اللي شايفينه، مش اللي بنقوله.
