٠٠٠ بداية الدراسة… وقلوب الأطفال المليانة توتر وتشتت!
كتبت د/ داليا خليل
كل سنة ومع بداية الدراسة، نلاقي أطفال كتير مش قادرين يركّزوا، بيتنقلوا من حاجة لحاجة بسرعة، ومخهم دايمًا مشغول بحاجة تانية.
فيه أطفال مش بيقصدوا يتعبوا مامتهم أو مدرسينهم، لكن عقلهم فعلاً بيجري أسرع من كلامهم، وده بيخليهم يتصرفوا بشكل يوحي إنهم “مش مركزين” أو “مش عايزين يسمعوا”…
لكن الحقيقة ممكن تكون حاجة اسمها فرط الحركة وتشتت الانتباه (ADHD).
٠٠٠٠٠يعني إيه ADHD؟٠٠٠٠٠
هو اختصار لكلمة طويلة شوية:
Attention Deficit Hyperactivity Disorder
يعني “اضطراب فرط الحركة وتشتت الانتباه”.
الطفل اللي عنده الحالة دي بيبقى عنده ٣ حاجات بنسب مختلفة:
1. تشتت الانتباه: صعب يركّز في حاجة واحدة فترة طويلة.
2. فرط حركة: جسمه دايمًا في حركة، حتى لو مفيش سبب.
3. اندفاع: بيتكلم أو بيتصرف قبل ما يفكر.
٠٠٠٠ وده بيحصل ليه؟
مش ذنب الطفل، ولا تربيتك السبب!
الموضوع ليه علاقة بكيفية عمل المخ ونقل الإشارات بين الخلايا.
يعني ببساطة، مخ الطفل بيتحرك بسرعة جدًا، ومحتاج تنظيم أكتر عشان يهدى ويتعامل مع المواقف.
كمان الضغط النفسي، التوتر، وقلة النوم أو النظام ممكن يزودوا الأعراض
وده ممكن يخلي الطفل القَلِق يظهر كأنه عنده تشتت أو فرط حركة.
لكن لما نحضنه، ونتكلم معاه، ونطمنه، القلق بيقل، والتركيز بيرجع واحدة واحدة.
الاهتمام بمشاعر الطفل بيمنع تدهور الحالة.
# إزاي نساعد الطفل في البيت والمدرسة؟
1. نظام ثابت: مواعيد نوم وأكل ومذاكرة منتظمة.
2. تشجيع مش توبيخ: كل مرة يركّز أو يهدى، امدحيه.
3. الشرح البسيط: ما تطلبيش منه حاجات كتير في نفس اللحظة.
4. مهام صغيرة: بدل ما تقولي “ذاكر ساعتين”، قولي “ذاكر 15 دقيقة وبعدين خُد بريك”.
5. حضن وكلمة طيبة: الطفل محتاج إحساس بالأمان مش بالعقاب.
٠٠٠ كلمة أخيرة للأهل والمدرسين٠٠٠٠
الطفل اللي عنده تشتت أو فرط حركة مش “مشاغب” ولا “كسلان”،
هو طفل عنده طاقة مختلفة وطريقة تفكير مميزة.
لو اتفهم صح واتوجه صح، ممكن يبدع في مجالات محدش يتخيلها.
بداية المدرسة مش اختبار للطاعة،
لكن فرصة نفهم كل طفل بطريقته…
ونفتكر دايمًا إن العقل المختلف مش دايمًا مشكلة، ممكن يكون نعمة محتاجة طريقة تربية خاصة.
