شاري مين؟
بقلم: ميرفت عبدالله
هو ممكن تانى نشترى اللى اتباع!
ولا ممكن لحظة تتنسى الاوجاع!
والقسوة و الألم وموت الحنين
والضياع بين متاهات السنين
عمر اتسرق
بين الوجع وبين الانين!
و لسه تانى
بتقولى شارى !
شارى مين !؟
مش بسألك
ولا عاوزة لحظة اسمعك
حفظت صم الكلمتين
الغرام مش بالكلام
والعشق هبة من الرحمن
وأنت فين من الحب فين !
كنت فين ؟!
ولا لحظة حسيت معاك أمان
ولا صدق نبضة للحنان
و لا حتى حسيتك إنسان !
انت مين؟!
وجع السنين
ألم ندم وعمر حزين
ولسه تانى بتشترى!
انا موافقة أشترى
بس اشترى كل المباع
شروة واحدة مفيش خداع
اشترى وحع السنين
اشرب من كاس الأنين
أبكى بدمع الندم
أصرخ لو صرخة ألم
افهم اللى ما يتفهم
اشترى قلب انكسر
اشترى عمر انهدر
والتمن عمرى اللى فات
لو قدرت ترجعه
اشترينى
لو قدرت ترجع الدموع تانى لعينى
اشترينى
لو قدرت ترحع فرحتى لحظة وحنينى
اشترينى
لو قدرت تمحى وجع وألم سنينى
اشترينى !
و ان كان محال
و مستحيل
اشترى للجاى وداع
يمكن نودع الأوجاع
يمكن ينام الألم
فى حضن الندم
و تتمسح دمعة عينى
يمكن !
